Hifadhi ya Kitaifa ya Samburu ni eneo linalolindwa katika sehemu ya kaskazini mwa Kenya. Inachukua muda wa takribani saa 6 kusafiri kwa gari kutoka Nairobi. Mandhari katika hifadhi yanaweza kuwa na misitu, nyika na milima. Mto wEwaso Nyiro hupitia mpaka wa Kusini wa hifadhi na ndio chanzo cha uhai katika eneo hili. Maji yake hutumiwa na watu, mimea na wanyama.

Samburu ni eneo lenye wanyamapori wengi. Lina mandhari ya joto, nyika, ardhi tambarare na mto. Miezi ya Februari na Machi ndiyo huwa na joto jingi zaidi, ikifuatwa na misimu miwili ya mvua katika mwaka. Mandhari kame huwa na mimea ya mitende kwenye changarawe, na kwa umbali, unaweza kuona milima ya Koitogor na Olelokwe.

Wageni huzuru eneo la Samburu ili kuangalia tembo, chui, simba, twiga na zaidi ya aina 450 za ndege. Jambo la kipekee katika eneo hili ni pundamilia wa Grevy wanaotambulika kwa milia yao miembamba, masikio makubwa yaliyoviringa na miili mikubwa. Wakati wa ziara ya kutazama wanyama, unaweza kuona mbuni wa Kisomali, mamba wa Nile na kundi kubwa la paa aina ya choroa, wote wanaweza kuishi jangwani na hupenda mazingira yenye joto kama haya. Gundua sehemu mbalimbali za eneo hili.

Samburu inajulikana kwa kuwa na idadi kubwa sana ulimwenguni ya tembo waliofanyiwa utafiti. Kutokana na miaka 20 ya utafiti, tembo wa eneo hilo wanaaminika sana na huweza kukaribia magari, haswa lori la watafiti wa Save the Elephants. Tembo wanaweza kukumbuka mambo kwa muda mrefu. Wao huelewa mipaka ya Hifadhi ya Samburu na huonyesha tabia tulivu wakiwa katika eneo lililolindwa. Gundua sehemu mbalimbali za eneo hili

Tembo hutekeleza jukumu muhimu zaidi kama wahandisi wa mandhari katika mazingira. Husaidia katika usambazaji wa mbegu kwa kula matunda kutoka miti na kisha kueneza mbegu kupitia samadi zao. Tambo hupasua magamba ya miti, hukata mimea na kusababisha mimea kukua tena na kusambaza mbegu nyingi. Wakati wa kiangazi, tembo huchimba mashimo kutafuta maji ambayo hutumiwa baadaye na wanyama wengine. Tembo wana athari kubwa sana katika mandhari.

Shirika la Save the Elephant lilianzishwa mwaka wa 1993 na limejitolea kulinda mustakabali wa tembo na kudumisha hadhi ya ekolojia katika eneo wanakoishi. Makao makuu ya shirika la STE ni Nairobi na linafanya kazi Afrika kote ili kuelewa na kulinda tembo. Kituo kikuu cha utafiti kiko Samburu, ambako tembo hufuatiliwa kupitia nchi kavu, angani na kwa kutumia mbinu ya GPS. Wao huangazia utafiti kama msingi ambapo wanaweza kufanya maamuzi ya mipango na kuunda sera na kujitahidi ili kuboresha uhusianao uliopo kati ya binadamu na tembo. Gundua eneo hili.

Katika miaka ya 1960, mwanabayolojia aliyeitwa Iain Douglas-Hamilton alianzisha utafiti wa kwanza wa kitabia wa tembo wa porini nchini Tanzania, kwa kutumia ndege ndogo ya kuwafuatilia na kuwahesabu. Mwaka wa 1993 alianzisha shirika la Save the Elephants, na kisha akachagua tembo wa kipekee walio wapole na wanaoamini wa Samburu kama somo katika utafiti mpya wa muda mrefu kuhusu tembo. Utafiti uliofanywa Samburu huleta ufahamu wa kimataifa wa vitisho kwa tembo na huleta ufumbuzi wa kuhakikisha usalama wa tembo kwa ajili ya kizazi kijacho.

Shirika la Save the Elephants linafanya uchuguzi wa angani kuhusu tembo na pia kufuatilia kila tembo kwa kutumia mikanda ya GPS. Kwa kumweka tembo katika hali ya nusu kaputi kwa haraka, daktari wa wanyama huweka mkanda kwenye shingo la tembo ili kufuatilia mahali alipo. Data hii huwasaidia watafiti kuelewa jinsi wanyama hawa hutembea mbugani, na pia kuchunguza maisha ya tembo mahususi. Kwa kuchunguza data ya GPS, shirika la Save the Elephants linaweza pia kupata kiotomatiki arifa za kuonyesha kuwa mnyama ameacha kutembea. Kufikia sasa STE imewawekea jumla ya tembo 266 mikanda kote barani Afrika.

STE ilikuwa ikikusanya data nyingi kutoka mikanda ya GPS iliyowekwa kwenye tembo, lakini ilihitaji njia ya kuichanganua. Katika mwaka wa 2006, STE ilianza kuweka data ya mikanda kwenye mandhari makubwa ya dijitali ya Google Earth, ili kuruhusu ufuatiliaji bora wa miendo ya tembo. Kwa sasa inatumia uwezo wa kitarakilishi wa Google Earth Engine, ili kuchanganua zaidi ya maeneo milioni tano yaliyorekodiwa kutoka tembo 266 kwa zaidi ya miaka 17.

Tembo hutembea popote na mara nyingi hukutana na barabara, nyumba, mashamba na watu. Mgogoro kati ya watu na tembo ni tatizo kubwa katika ulinzi wa tembo, na mbinu moja ya kuhifadhi tembo ni kuwatengenezea njia salama. Kwa kutumia data ya ufuatiliaji wa tembo, njia hizi za chini ya barabara kuu zilitengenezwa ili kuwaruhusu tembo kutembea kwa usalama chini ya barabara hii kuu. Gundua eneo hili

Ujangili ndio hatari kubwa zaidi inayokabili maisha ya tembo katika Afrika. Tembo huuawa kwa ajili pembe zake ambazo huuzwa ulimwenguni kote. Tembo waliokomaa wakiuawa huacha athari kubwa katika familia zao na husababisha ndama wengi kuwa mayatima. Vita dhidi ya ujangili vinahitaji adhabu kali kwa majangili na pia kuzuia matumizi ya bidhaa zinazotokana na pembe za tembo.

Kifo cha tembo ni hasara kubwa katika utamaduni wa Wasamburu. Ujangili husababisha ukosefu wa uthabiti katika maisha ya watu wanaoishi pamoja na tembo, wakati tembo wanapouliwa kwa ajili ya pembe. Mpango wa Northern Rangelands Trust unahusisha wenyeji katika kuhifadhi, kubadilisha ardhi kuwa mbuga za wanyama, kuunda nafasi za kiuchumi kupitia utalii, na hata kuonyesha thamani ya tembo katika eneo la Samburu.

Askari wa pori wamejitolea kupambana na majangili na huhatarisha maisha yao wakilinda tembo wa Kenya. Wao hudokezewa na wenyeji na mashirika na kisha husaka mbuga wakiwa na mbwa waliofunzwa kutafuta shughuli haramu. Kazi bora ya Hifadhi ya Wanyamapori ya Lewa na Shirika la Huduma kwa Wanyamapori la Kenya imesaidia kupunguza idadi ya tembo waliouawa katika sehemu ya Kaskazini mwa Kenya kufika chini ya asilimia 1 ya idadi ya jumla. Huu ni ushindi mkuu katika vita vya kulinda tembo.

Ndama wa tembo hufanyaje wakati tembo ameuliwa? Shirika la David Sheldrick Wildlife Trust lilianzishwa mwaka wa 1977. Jukumu lake ni kutoa usaidizi kwa wanyama wanaohitaji msaada, wakiwemo mayatima. Katika kituo chao cha kutunza wanyama yatima mjini Nairobi, walinzi huwalisha na kuwafanyiza mazoezi tembo na kuhakikisha kuwa wamejumuishwa vizuri katika kundi la mayatima. Aina hii ya utunzaji ni muhimu katika kuwalea tembo wenye afya bora wanaoweza kurejeshwa tena porini. Sheldrick Trust imelea ndama wa tembo zaidi ya 180 waliohudumiwa kwa mkono. Gundua eneo hili

Katika mwaka wa 2012, STE iliomba kwa mara ya kwanza Trekker ya Taswira ya Mtaa iletwe eneo la Samburu ili kupiga picha za digrii 360 za tembo katika pori. Si kila mtu anaweza kutembelea Samburu, lakini kila mtu anaweza kufanya safari ya mtandaoni ili kuwaona tembo hawa. Kwa kufanya tembo waonekane kwa urahisi mtandaoni, watafiti na watetezi wanatarajia kuwa watu wataweza kuwatazama zaidi tembo na kufurahi zaidi kushiriki katika kulinda mustakabali wao.